Ter. 12 setembru 2023, 13:56h-Media Defisiensia,
Governu Timor-Leste, liuhusi Ministériu Finansas, ohin loron 12 fulan-setembru
tinan 2023, hala’o Jornada Orsamentál, semináriu ida-ne’ebé marka hahú prosesu
preparasaun ba Orsamentu Jerál Estadu (OJE) tinan 2024 nian. Eventu ne’e hala’o
iha auditóriu Kay Rala Xanana Gusmão, iha Ministériu Finansas, Dili.
Tinan ida-ne’e, ho tema “Kontinua Konsolida no
Transforma Prestasaun Servisu liuhusi Hadi’a Sistema Jestaun no Estratéjia
Investimentu”, Jornada Orsamentál ne’ebé hahú ho diskursu abertura husi husi
Primeiru-Ministru, Kay Rala Xanana Gusmão. WhatsApp Image 2023-09-12 at
14.08.16
Sesaun oin-oin iha eventu ne’e, diskute ona temátika
sira ne’ebé iha relasaun ho orsamentu no prioridade governamentál sira. Hafoin
diskursu abertura, halo ona diskusaun ba tópiku sira hanesan: análize situasaun
makroekonómika, dezempeñu investimentu Fundu Petrolíferu nian, empréstimu,
Parseria Públiku-Privada (PPP), apoiu doadór sira, dezenvolvimentu setór
finanseiru no papél Banku Nasionál Komérsiu Timor-Leste nian (BNCTL-sigla iha
lian portugés) iha ekonomia nasionál.
Tuirmai aprezentasaun kona-ba prioridade no objetivu
sira ne’ebé atu atinje iha tinan 2024, durante mandatu Governu Konstitusionál
IX nian.
Iha ninia diskursu abertura Jornada Orsamentál,
Primeiru-Ministru subliña katak “prinsípiu orientadór sira tenke halo desizaun
finanseira” Governu nian “atu halo Timor-Leste ida prósperu no armoniozu” maka
“transparénsia, responsabilizasaun, inkluzaun no sustentabilidade”.
Xanana Gusmão espresa konfiansa iha kapasidade Governu
nian hodi “harii futuru ida prósperu no sustentavel ba sidadaun hotu-hotu” no
hateten mós katak objetivu prinsipál husi OJE tinan 2024 “mak atu promove
kreximentu ekonómiku hodi prioriza ita-nia povu nia moris-di’ak no
dezenvolvimentu”, ho haree liu ba kreximentu ekonómiku, dezenvolvimentu
infraestruturas, edukasaun, saúde, agrikultura no jestaun rekursus”.
Primeiru-Ministru apela “kolaborasaun no envolvimentu
parte interesada sira hotu, inklui Governu, setór privadu, organizasaun
sosiedade sivíl no ita-nia sidadaun sira” hodi garante “implementasaun ho
susesu orsamentu ida-ne’e nian”.
Eventu ne’e konta ho partisipasaun husi membrus
Governu hotu, Prezidente no membrus Parlamentu Nasionál, nune’e mós
reprezentante husi liña ministeriál balu, ajénsia autónoma, autoridade
munisipál no sosiedade sivíl sira.
