Dili-11/12/2025-Média Defisiensia, Loron 16 ativísmu kontra violensia hasoru feto, Sekretáriu Estadu Igualidade (SEI) no Fokupers hamutuk ho maluk feto, mane hala’o marsa hahú husi rotunda Saudozu Nicolao Lobato Comoro ba sentru saúde Golgota liu ba rai kotu remata iha área Tasi 3, liuhusi atividade marsa, atu bele hasa’e konsiensia literasia Digitál no Online seguru ba feto no labarik feto iha Diversidade hotu no ensera atividade kampaña refere.

Ba jornalista sira Diretora Fokupers, Domingas Afonso Amaral hatete, dadus ne’ebé hatudu husi FOKUPERS nia rejistu barak tebes maibé kazu 60 mak konsege kontinua halo akompanña mentu ba prosesu legal asesu ba justisa, kazu sira ne’e mai husi violasaun sexual.

“Tuir dadus ne’ebé ami rekolla hahu Janeiru to’o Setembro hamutuk 179 ne’ebé rejista iha Fokupers nia data baze, no husi kazu hirak ne’e 60 konsege kontinua halo akompañamentu ba prosesu legal asesu ba justisa nian. Ita haree katak rejultadu positivu balu iha kazu aselera lalais liu kazu violasaun sexual nia prosesu lalais liu no suspeitu hetan pena prizaun ba tinan 10”, Dehan Diretora Fokupers iha Área Tasi 3, Dili, 10/12.

Diretora hatutan, maioria kazu ne’ebé rejista violasaun fiziku ho numeru ne’ebé aas liu no ita konsiente kazu ba iha violasaun sexual, no ba labarik ne’e kontinua numeru ne’ebé aas maioria ida ne’ebé barak liu mak kazu abandona.

“Hau hanoin parte hotu halo esforsu lubuk ida ba prevensaun liuhusi sosializasaun, formasaun no fahe informasaun husi Plataforma média sosial, atu bele bolu ema hotu atu atensaun no prevensaun inklui muda konsiensia hapara violensia. Maibé ita nafatin halo sensibilizasaun ba feto no mane sira iha parte prevensaun ne’ebé iha kolaborasaun mane sira bele redus halo violensia no halo komunikasaun ne’ebé saudavel hahu husi familia to’o sosiedade hotu”, Afirma Diretora.

Enkuantu, dadaun ne’e dadus ne’ebé iha kuaze mai husi munisipiu Liquia ho numeru violasaun domestika no sexual makas utuan ne’ebé mai rejistu iha FOKUPERS no tuir fali munisipiu Ermera no munisipiu seluk kuaze atu hanesan.

Iha fatin hanesan partisipante Faustinha Filomena R. L. Daconceção, dehan sente orgullu no kontete bele hola parte iha atividade sensibilizasaun ne’e, hodi haklean sira nia koñesimentu nune’e utiliza Plataforma dijital sira la’o tuir nia dalan, no hatene mós kona-ba violensia domestika oinsa ita halo prevensaun.

“Hau sente konteten no asiste ona atividade ne’e hodi komprende di’ak liutan saida mak violensia domestika ba labarik feto no mane. Ho atividade ne’e hanesan oportunidade mai hau atu bele hatene informasaun sira kada tinan ida dala ida”, Tenik Partisipante Faustinha.

Entretantu, partisipante ne’e husu ba alin feto sira agora utiliza Facebook no Tiktok uza barak ona, tanba ne’e ita uza tenke tuir nia dalan bainhira halo komunikasaun presiza respeitu malu.

Jornalista  :  Alex

Editor        :  Média RKDTL