Dili-27/11/2025- Média Defisiensia, Sekretáriu Estadu Igualidade (SEI) lansa kampaña dahuluk kona ba zero toleransia ba violensia hasoru feto no labarik feto sira iha Timor Leste, liga liu ba literasia teknologia dijitál online, hodi bele hasa’e konsiensia sosiedade sira nian liu-liu ba feto no labarik feto sira bainhira utiliza teknolojia dijitál ida ohin loron nian ho di’ak atu la bele mosu Violensia sira.

Ba Jornalista sira Sekretáriu Estadu Igualidade Elvina de Sousa Carvalho informa, kampaña ida ne’e bele hasa’e feto no labarik feto sira nia koñesimentu kona-ba oinsá útiliza teknólojia dijitál nune’e la bele sai vítima ba teknólojia.

“Dala barak feto no labarik feto sira mak sai vítima maibé lakoi ko’alia sai, agora ita kampaña atu halo saida? Tanba saida mak foti tema ida ne’e? tanba ita hakarak hasa’e ema nia koñesimentu labarik feto sira no ema nia koñesimentu uza teknólojia, atu hasa’e koñesimentu kona ba oinsá uza ho seguru uza ho di’ak, uza ho maneira ne’ebé mak di’ak atu bele hasa’e ita nia koñesimentu ita nia abilidade maibé la’os par atu hakanek ita nia dignidade, maibé la’os sai fali vítima ba teknólojia dijitál ne’ebé mak agora mosu,” dehan Elvina iha suku hera postu administrativu Cristu Rei Munisípiu Dili 25/11.

Nia hatutan, kamapaña refere importante tebes atu feto no labarik feto sira hatene oinsá utiliza media sosiál no tenkólojia dijitál, partisipante sira nia reponsabilidade atu habelar informasaun sira ne’e ba ema seluk atu bele minimiza violensia hasoru feto no labarik feto sira.

“Kampaña ida ne;e importante bai ta atu hasa’e konsiensia, ita ohin iha ne’e hamutuk ita iha responsabilidade atu hatete husi ibun ba ibun hasa’e ema nia koñesimentu kona ba literasia dijitál tanba nia inimigu invijivel, katak ema ne’ebé subar iha ita nia telephone nia kotuk, ita la hare nia fizíkamente maibé nia bele kontrola ita, psikólojikamente iha maneira par atu bele iha hanoin ne;ebé bele vítimiza ita, tanba ne’e mak ha’u hanoin ita sira iha ne’e komprende saida mak literasia dijitál, maibé labarik barak mak seidauk komprende kona ba literasia dijitál ne’e, seidauk hatene atu bele uza media sosiál no uza teknólojia ba sira nia di’ak,” hakotu nia.

Nune’e Xefe Suku Hera Antonino Marcos orgullu no agradese ba koperasaun sira hodi bele selebra kampaña ne’e, tanba atividade sira ne’e importante atu hafanun inan feto no joven sira atu bele hadook an husi violensia sira ne’ebé sempre akontese.

“Agradese ba ekipa husi SEI ne’ebé durante ne’e mai kopera, mai komunika hoa autoridade sira hodi selebra loron importante ida ne’e. Hakarak hatete kampaña sira hanesan ne’e importante atu nune’e fanun ita nia inan feton no joven feto sira atu bele hadook an husi violensia sira ne’ebé mak akontese, liu liu agora dadau ita hare media sosiál ninia publikasaun ne’e buat ne’ebé ke la merese atu publika mais publika tanba modern teknólojia, mais ha’u hanoin fila fali ba ida-idak tenki prevene nia an, tenki hadok an husi violensia sira hanesan ne’e,” tenik xefe suku.

Fatin hanesan, reprejentante partisipante Joanino da Silva Fereira, sente apresia tebes ho atividade ne’e tanba iha fatin refere akontese hela atu hirak ne’e, husi ne’e sira presija tebes informasaun sira ne’e.

“Ha’u senti apresia tebes no mos kontenti tebes, tanba loron ida ohin kona ba asuntu violensia nian ne’e ba feto no labarik feto sira, ami mos kontenti tebes tanba ami presija tebes informasaun sira ne’e, dalaruma iha ne’e mos hanesan ohin mensiona iha ne’ebá katak sei iha duni balu ne’ebé mak iha duni maibé sira tauk no moe atu bele hatete sai, maibé liu husi prejensa SEI nian iha ne’e bele habelar liu tan ba ami motiva ami, maske amin nia partisipasaun ne’e mínimu maibé ami mos sei habelar tutan baa mi nia maluk sira ne’ebé la mai partisipa,” tenik Joanino.

Entretantu atividade kampaña loron 16 ativismu kontra violensia hasoru feto no labarik feto sira ne’e hahú 25 novembru too 10 Dezembru tinan ne’e. Tuir planu atividade kampaña ne’e sei hala’o iha munisípiu 3, hanesan Likisa, Baucau, no Manatutu ikus sei insera iha Tasi Tolu hamutuk ho loron Direitus Umanu nian.

Jornalista                   : Alex

Editór                         : Média RKDTL