Aileu-16/12/2025-Média Defisiensia, Asosiasaun Ema Afeta Lepra Timor-Leste (AEAL-TL) hamutuk ho Ministeriu Agrikultura no Peskas (MAP) inklui Autoridade Lokál husi Suku Seloi kraik kollieta Ikan Nila no Lele Jumbu iha Sentru Hakbi’it Ema Afeta Lepra no Defisiensia Aileu hodi distribui ba membru Grupu sira atu bele kontinua hakiak nune’e bele ajuda ekonomia familia.
Ba Média Defisiensia, Reprejentante Diretur MAP Munisipiu Aileu Imaculada da C. Pereira, hato’o parabens ba Asosiasaun nia inisiativa ne’ebé iha hodi bele tulun maluk Defisiensia sira liu-liu Ema Afeta Lepra iha Munisipiu Aileu ba hakiak ikan.
“Iha ne’e lori de’it Diretur nian naran hakarak hato’o parabens ba inisiativa ne’ebé mak asosiasaun halo ona, hodi forma grupu sira hodi implementa hela atividade agrikultura nian ne’ebé mak di’ak tebes, husu atu nafatin atu dezenvolve sira hanesan ne’e iha tempu tuir mai,” tenik reprejentante ne’e 16/12.
Nune’e mos Xefes uku Seloi Malere Antonio do Santos Loco hatete, labele atu fo de’it kuitadu ba maluk Defisiensia sira maibé tenki fo mos oportunidade atu sira bele koko liu husi kapasidade ne’ebé mak iha hodi implementa kreatividade sira ne’ebé mak sira iha.
“Ha’u lori xefe suku Aisirimou Seloi malere hamutuk ho komunidade sira hotu nia fatin hakarak agradese tebes ba ekipa Asosiasaun Lepra sira Diretur Ezekutivu iha ne’e, ha’u hanoin katak atividade sira hanesan ne’e dala ruma ema dúvida ou ema ho Defisiensia sira katak la bele halo ida ne’e, la bele halo ida ne’ebá, dala ruma sira hetan liafuan kuitadu barak los, maibé lolos ne’e ha’u hakarak hatete katak lolos ne’e la presija fo tan liafuan kuitadu mais husik oportunidade atu sira bele koko entaun, ho oportunidade sira ne’e atu justifika ka hatudu ba komunidade sira hotu katak ema ho defisiensia bele. Entaun so oportunidade ne’e mak ba sira seidauk to’o, ou oportunidade ne’ebé maki ha ne’e mak ema fo de’it, entaun pronto mesmu ke sira hanesan ne’e mais sira hasoru difikuldade barak sira koko atu ultrapasa husi situasaun ida ne’e ho sira nia kreatividade ho sira nia esperiensia ne’ebé iha sira buka atu esplora ba malu hodi bele to’o iha faze sira hanesan ne’e, entaun ami hanoin katak hanesan lideransa komunitária ita kontenti porque ho espasu isra ne’e maki ta bele espanda tan koñesimentu ideia ne’ebé mak sira iha ne’e bele dezenvolve no hatudu nafatin ba públiku sira hotu inkluzividade entre ema hot-hotu iha parte hot-hotu iha desizaun iha atividade hortikultura inklui atividade sira hanesan ne’e mak importante, entaun ha’u hanoin katak lori estrutura tomak lori suku rua ne’e nia faitin agradese bai ta bot sira no hanesan mos lideransa komunitária ita pronto hare mos espasu balu ne’ebé mak livre hela karik ita boot sira nesesita ita pronto atu kopera nafatin para bele halo dezenvolve liu tan, se ida ne’e maki ta boot sira hakarak sai hanesan sentru ba Ema ho Defisiensia hotu iha Aileu ita pronto par apoiu 100%,” tenik Loco.
Etrentantu tuir planu asosiasaun nian sei aumenta hakiak tan manu rade iha sentru refere.
Jornalista : Alex
Editór : Média Defisiensia
