Dili-07/07/2025-Media Defisiensia, Grupu Defisiensia Kreativu (GDK), lansa musika 8 ho tema “Promove Musika Inklusivu”, hodi komemora loron nasional ba ema ho defisiensia iha Timor-Leste.
Koordenadora Grupu Defisiensia Kreatividade, Mafalda F. Gusmão hatete, grupu ida ne’e harii hodi promove ema ho defisiensia nia talentu liu husi musika, tanba ema hotu hatene ema la ho defisiensia maka iha telentu musika. Liuhusi grupu defisiensia kreativu nia talentu no esforsu ohin loron bele lansa musika 8 ne’ebé maka durante ne’e aprezenta ona iha Dili laran nomos ba Municipio sira, hodi hatudu ba sosiedade ema ho defisiensia mós bele fó haksolok ba ema seluk ho abilidade naton.
“Grupu defisiensia kreativu harii 16 fulan janeiru 2023 kompostu husi ema nain 7 nain 3 la ho defisiensia no nain 4 defisiensia. Ami nia atividade durante ne’e halo mak treinu muzika no kria muzika ne’ebé ami sei lansa ba publiku ho muzika oinoin hanesan muzika domin, social, politika no edukasaun. Tema espesifiku ba lansamentu muzika ne’e mak “halakon tia ba hanoin ida negativu ba EHD” dala barak hateke ema ho defisiensia ho matan sorin de’it maibé ho lansamentu ne’e hodi loke sosiedade nia hanoin atu labele haketa ami ho defisiensia tanba ita hamutuk sai komunidade ida inkluzivu hodi fó apoiu ba malu. Ami sei kontinua halo muzika kona-ba kritiku sira no edukasaun atu nafatin luta liuhusi muzika nune’e ami bele moris hanesan ema bainbain iha sosiedade nia leet ho prinsipiu GDK nian tanba susesu ne’e tenke liuhusi prosesu ida”, dehan Koordenadora GDK iha salaun Xanana Readroom, 04/07.
Koordenadora Grupu Defisiensia Kreatividade hatutan, hato’o mos votus solidariedade ba maluk defisiensia sira hotu ne’ebé selebra loron nasional ba ema ho defisiensia fiar katak ho atividade ne’e bele fó motivasaun ba ita boot sira ne’ebé haksumik aan no balun iha kapasidade ne’ebé di’ak liu atu hola parte iha oportunidade hamutuk, hodi luta hodi sai husi situasaun sira ho atividade ne’e bele fó dalan ba ita hotu hodi luta ba dezenvolvimentu no kontribui liuhusi muzika.
Iha fatin hanesan Asesor Principal inkluzaun Sosial Gaspar Afonso hatete, orgulhu no apresia ho Grupu Defisiensia Kreatividade, nia talentu hodi hatudu ba públiku EHD la lakon oportunidade ho sira nia kapasidade rasik, hodi kria muzika ne’ebé fó benefisiu ba ema hotu nia hanoin inklusaun iha sosiedade.
“Parabens ba ita hotu ohin loron nasional ba ema ho defisiensia no parabens ba koordenadora GDK haksolok tebes inisiu husi blain youniben to’o mai hamosu KEY WORD hatudu ba sosiedade katak ami ho defisiensia maske iha difikuldade barak maibé ami mos iha talentu, abilidade labele hateke ami ho matan sorin, labele minimiza ami nia kapasidade. Tanba ami mós ema hanesan ita bo’ot sira espera katak ba entidade hotu ho fuan boot apoiu ba biban ida ne’e Key Word, bele lansa primeiru album espera katak, Key word nia album ne’e motiva ema hotu liuliu ba maluk ho defisiensia ne’ebé iha talentu atu hakbesik aan ba sira hodi espresa talentu muzika sira”. Tenik Gaspar Afonso ba jornalista sira
Asesor Prinsipal inkluzaun Sosial salienta, hato’o parabens ba grupu Key Word, tanba susesu ne’e liuhusi prosesu hafoin hetan nia rezultadu. Apresia mós ba maluk sira, parseiru nasional no internasional sira nia apoiu grupu refere bele lansa ona muzika 8 iha loron nasional ba EhD iha rai-laran.
Jornalista : Geraldino Magno
Editor : Média RKDTL
