Dili-06/11/2025-Média Defisensia, Prezidente Republika Demokratika Timor-Leste, hato’o simpatia no solidariedade ne’ebé kle’an hafoin inundasaun no rai-halai foin lalais, ne’ebé akontese iha Vietnam Sentrál, sai agravadu liu tan husi aprosimasaun tufaun Kalmaegi.
Prezidente Republika, José Ramos-Horta, ba jornalista sira liuhusi Komunikadu Imprensa hatete, haruka ona mensajen formál simpatia no solidariedade ne’ebé kle’an ba Exelénsia Lương Cường, Prezidente Repúblika Sosialista Vietnam, hato’o sentidu kondolénsia profunda husi povu Timor-Leste nian.
“Ha’u hato’o ba Sua Exelénsia, ba família vítima sira, no ba povu Vietnam tomak sentidu kondolénsia profunda Timor-Leste nian, hamutuk ho ami-nia espresaun solidariedade fraterna iha momentu tristeza no prvasaun ida-ne’e. Ha’u akompaña ho admirasaun kle’an, autoridade vietnamita sira-nia esforsu inkansável, ekipa salva moris, no komunidade lokál sira hodi salva vida sira, fornese asisténsia umanitária, no harii fali infraestrutura sira ne’ebé afetadu. Espíritu reziliénsia no unidade ne’ebé karakteriza povu Vietnam nian nafatin sai hanesan fonte inspirasaun ba ita hotu”, Dehan PR liuhusi Komunikadu Imprensa, 05/11.
Prezidente Ramos-Horta reafirma relasaun fraternu entre nasaun rua ne’e. Timor-Leste hamriik iha solidariedade ho Vietnam no hato’o esperansa ba susesu husi esforsu tulun no rekuperasaun ne’ebé la’o hela.
Jornalista : Asesu Komunikadu Imprensa liuhusi Média Officer PP
Editor : Média RKDTL
