Dili-07/11/2025-Média Defisiensia, relasiona ho formasaun ne’ebé Asosiasaun Ema Afeta Lepra Timor-Leste fo ba Alumi no Estudante iha area Saúde nian, kona ba oinsá bele halo  diagnose ba ema Afeta Lepra sira no halo mos prevensaun ba moras lepra iha TL.

Nune’e AEAL-TL mos lori sira atu vizita ba organizasaun Defisiensia sira atu observa direita kondisaun servisu no kreatividade sira ne’ebé iha.

Tuir Formadora ba Programa DEAL no Prevensaun Moras Lepra Erna da Conceição do Espirito Santo hatete, objetivu husi vizita ne’e atu sira mos bele observa direta organizasaun sira nia atividade no kreatividade sira ne’ebé mak iha, husi ne’e sira mos bele komprende oinsá atu halo atendimentu ba ema ho defisiensia sira iguál iha sira nia kareira.

“Di’ak, objetivu husi Ami ho estudante sira mai halo vizita iha organizasaun RHTO ne’e, oinsá atu hasa’e estudante sira ne’ebé eskola iha area saúde sira nia koñesimentu kona ba maneira saida mak sira atu halo atendimentu ba ema ho defisiensia atu nune’e bainhira sira iha sira nia kareira depois de sira remata iha sira nia estudu sira mos bele halo atendimentu ba ema ho defisiensia, no la bele halo diskriminasaun bainhira halo atendimentu ba ema ho defisiensia.

No husi observasaun ne’e mos oinsá sir abele hare direita kona ba atividade sirane’ebé mak ema ho defisiensia sira halo no kreatividade sira ne’ebé mak organizasaun sira halo,” dehan Erna iha RHTO Suku Lahane Postu Administrativo Nain Feto Munisípiu Dili 06/11.

Fatin hanesan, reprezentante formandus Julmira Bakita Bareitu Ximenes no Junior Manuel de Sousa, senti kontenti tanba liu husi vizita ida ne’e bele aumenta koñesimentu no esperiensia balu husi maluk defisiensia sira ne’ebé servisu iha RHTO.

“ami husi estudante AEAL-TL tuir ha’u senti kontenti tanba mai iha organizasaun RHTO ne’e ha’u agradese tanba sira fahe esperiensia lubuk id aba ami no liu husi atividade sira ne’ebé mak sira halo, husi ami nia observasaun ne’ebé mak iha husi defisiensia sira, atividade sira ne’ebé maka sempre úniku no furak tebes, hanesan iha parte arte nian hanesan sira halo aifunan husi surat tahan sira halo uza maneira oinsá mak bele sai furak, nune’e mos ba iha parte kustura nian sira suku ropa, sukku karteira, pasta ne’ebé mesak furak tebes tuir sira nia kreatividade,” tenik Julmira.

“ha’u kontenti tebes bainhira mai iha fatin ida ne’e ami komprende buat lubuk ida, koñese mos RHTO. Ami mos hatene kona ba kreatividade sira ne’ebé mak maluk defisiensia sira iha RHTO halo, mak hanesan liu husi arte nian sira halo aifunan, suku nian, no mos mekanik modifika motor ba ema ho defisiensia sira liu husi sira nia kreatividade ne’ebé maki ha, ida ne’e mak ohin ami observa iha RHTO,” tenik Junior.

Enkuantu planu atividade vizita organizasaun sira mak hanesan, RHTO, ADTL, AHDM-TL, CDI-TL CBRN-TL, KDT-TL, FUNDASAUN AHISAUN. ne’e total estudante ne’ebé tuir formsaun ne’e hamutuk 16.

Jornalista                   : Alex

Editór                         : Média RKDTL