Dili-12/11/2025-Média Defisensia, Ministériu Agrikultura Pekuaria Peska no Frloresta (MAPPF) asina memoradu ho Catholic Relief Services (CRS), hodi implementa programa formasaun kona-ba hakiak lalar metan hodi garante ba ikan nia hahan.
Sekretariu Estadu Ministériu Agrikultura Pekuaria Peska, Domingos da Conceição dos Snatos hatete, orgullu boot ba inisiativa refere, liuhusi koperasaun bele apoiu servisu governu nian atu produs rasik ikan nia hahan hodi tulun maluk hakiak nain sira, tanba dala barak ai-han ikan ne’ebé importa husi rai-liur mai ho folin ne’ebé mak as tebes difikulta ba hakiak nain sira.
“Agradese ba inisiativa husi CRS bele koopera di’ak ho ministeriu ikus bele konklui asina memorandu koperasaun ne’e importante loos ligadu ba atividade agrikultura. Durante atividade agrikultura ita nia hakiak nain sira infrenta problema ne’ebé makas iha terenu mak ai-han ba ikan. Tanba ai-han ba ikan importa husi rai-liur nia presu aas tebes no dala barak konsentra deit iha kapital la distribui ba too area rural sira, hodi difikulta hakiak nain sira. Maske sira iha vontade atu hakiak maibé hahan ikan nian mak difikulta ba sira, ho CRS nia programa hakiak lalar metan bele sai hanesan ai-han ba ikan hodi fasilita komunidade hakiak nain, maske ho volume ne’ebé kiik ita dezenvolve neneik sei sai boot,” Dehan Sekretariu Estadu MAP, iha Salaun Komoro Dili, 11/11.
Sekretariu Estadu MAP salienta, lalar metan bele sai ai-han alternativa ida hodi subtitui ai-han importasaun husi rai-liur tanba ne’e husu ba parte rua ne’e atu servisu iha komunikasaun ba malu bainhira hasoru problema ruma.
“Hau hanoin ho koperasaun ne’e husu atu nafatin iha komunikasaun ho diresaun tekniku sira bainhira asoru problema ita bele fó solusaun imediata ba iha problema sira. Durasaun ba asina memorandu ne’e ba tinan ida nian, bainhira iha vantajen diak sei kontinua”, Subliña Sekretariu MAP.
Iha fatin hanesan Country Maneger, Yane Tamonob Pinto informa, liuhusi servisu hamutuk ida-ne’e bele apoiu hakiak nain sira bele produs rasik ikan nia hahan hodi redus sosa ikan nian hahan ho folin ne’ebé aas.
“Ohin ami asina memoradu ho MAP, atu bele suporta hakiak nain sira iha munisipiu ne’ebé determina, atu bele fó treinamentu no kapasitasaun ba toos nain sira hanesan aternativu ba hahan uma laran nian oinsa bele produs hahan ba ikan. Ita hatene durante ne’e toos nain sira hasoru problema, bainhira atu asesu ba hahan ikan nian, liuhusi atividade ne’ebé ami halao hela iha ami nia projetu fó treinamentu ba toos nain sira kona-ba oinsa hakiak lalar metan, ne’e hanesan alternativu sai hanesan hahan ba ikan ne’ebé baratu no sira bele hetan iha sira nia uma sorin la presiza osan maibé presiza ita nia servisu makas no konsisten no komitmentu ba produs hahan ikan nian”, Tenik Country Maneger.
Enkuantu, Projetu pilotu hala’o iha Baucau no Viqueque hamutuk ho grupu pilotu uma kain 20 kada uma kain halo kolam rua ka tolu tuir sira nia forsa, no konpromente sei esforsu hodi habelar ba iha Munispiu sira seluk. Iha asina memorandu ne’e hetan asina direta husi Ministru Agrikultura Pekuaria Peska no Floreta, Diretor sira no estaf sira husi CRS nian.
Jornalista : Geraldino Magno
Editór : Média RKDTL
