Aileu-13/05/2026-Média Defisiénsia, Tersa ne’e ekipa Ministeriu solidariedade social no inkluzaun promove seminar ho parseiru xave 38 iha salaun veteranus munisipiu aileu kona ba sosializasaun prosedimentu finanseiru, auditoria no monitorizasaun relatoriu liliu kona ba ezekusaun orsamentu, oinsa atu lao tuir matadalan hodi kontinua halo servisu sosial ba grupu alvu tuir programa ne’ebe sai tarjetu ba parseiru save sira.

Diretur Jerál Servisu Korporativus Fernando dos Reis hateten, realiza seminar ne’e ba implementador sira oinsa bele ezekuta orsamentu tuir prosedimentu no programa Ministeriu nian tanba iha mudansa ba orsamentu hodi jere ba programa oi-oin ne’ebé implentador sira implementa ba grupu alvu vulneravel sira iha baze.

“workshop ida ne’e atu sira bele hatene utilizasaun orsamentu tuir nia regras finansa no indikator sira tanba orsamentu ba tinan ida ne’e $1millaun ba 38 instituisaun sosial ne’ebe iha teritoriu” dehan Dirtor Jeral Servisu Korporativus Fernando dos Reis hafoin remata abertura ba seminar ne’e iha salaun Veteranus Munisipiu Aileu tersa, 12/05/2026.

Partisipante, Diretora ezekutiva Fundasaun Ahisaun, Ermenciana Alves nia parte haktuir, formasaun refere hanesan parte ida atu eleva koinesimentu hodi ezekuta fundus sira ne’ebé apoi husi parseiru ba programa advokasia, sosializasaun no hakbi’it kapasidade iha area oi-oin ba ema ho defisiensia inklui programa seluk ne’ebe sai tarjetu ba Fundasaun Ahisaun.

“Sim ne’e importante tebes atu nune’e bele hasa’e koñesimentu, oinsa bele jere ami nia programa hirak ne’ebe mak la’o iha organizasaun idak-idak sei wainhira la iha formasaun oinsa mak ita atu bele la’o ho di’ak ba iha futuro ne’ebe formasaun ida ne’e importante tebes” haktuir diretora Fundasaun Ahisaun Ermenciana Alves.

Sentimentu ne’ebe hanesan hato’o husi Diretora Sentru Esperansa ba Feto Me.Santina Imaculada de Oliveira, espresa, inportante tanba Ministériu Solidariedade Sosial no Inkluzaun bele tulun ona hodi fasilita programa oioin ne’ebe implementa ba labarik, no sobre vivente sira ne’ebe hetan violasaun oi-oin iha sosiedade.

Nia dehan ida ne’e atu fo hanoin oinsa bele utiliza orsamentu sira hirak ne’e tuir nesesidade sira ne’ebe mak iha, tanba orsamentu sira ne’e la mai husi ema ida maibe osan povu nian.

“ami sei uza ho resposnsabilidade ba kontabilidade ne’ebé mak klaru hodi nune’e atu responde ba situasaun sira ne’ebé mak organizasaun sira infrenta” dehan Diretora Sentru Esperansa ba Feto Me.Santina Imaculada de Oliveira iha seminar ne’e.

Seminar ne’e kona ba asuntu finansas nian tanba kada tinan orsamentu iha mudansa mos ba iha direisaun maibe nafatin tuir objektivu ministériu nian atu bele halo atendimentu ne’ebe mak dignu ba komunidade sira husi utilidade sosial ne’ebe mak instituisaun solidaridade sosial 38 hetan hanesan lalatak hodi implementa programa oi-oin ne’ebe mak halao nune’e bele mellora kondisaun vida ema vulneravel sira nian, maibe foka liu ba Sosializasaun prosedimentu finanseiru, auditoria no monitorizasaun relatoriu inklui ezekusaun ba fundus sira ne’ebe apoiu husi minist’eriu soliedariedade ba organizasaun 38 ne’ebe servisu direta ba sidadaun vulneravel sira iha baze.

Jornalista: Acy/Jina
Editor: Média Defisiénsia