Dili-30/04/2025-Média Defisensia, Prezidente Republika
Demokratika Timor-Leste, simu karta kredensial husi Embaixadór Kamboja mai
Timor-Leste relasiona ho Estabelesimentu embaixada residente dahuluk iha Dili

Tuir Prezidente no
Laureadu Nobel ba Pás José Ramos-Horta, hatete atividade serimonia simu Karta
Kredensial husi CHUN Sovannarith, rezidente dahuluk Embaixadór Estraordináriu
no Plenipotensiáriu Reinu Kamboja nian mai Timor-Leste.

“Serimónia kredensial,
ne’ebé hala’o iha Palásiu Prezidensial Nicolau Lobato, marka etapa istóriku iha
relasaun diplomátika entre Timor-Leste no Kamboja. Estabelesimentu embaixada
residente dahuluk Kamboja nian iha Dili hatudu parseria ne’ebé aumenta entre
nasaun rua ne’e. Tanba Sr. CHUN lori esperiénsia diplomátika besik dékada tolu,
inklui papél sira nu’udar Ministru-Konselleiru no Adjuntu Xefe Misaun ba
Béljika, Olanda, Luxemburgu, Áustria, no Uniaun Europeia. Nia asumi knaar
nu’udar Adjuntu Diretór-Jeral ba Departamentu Jeral ASEAN (GDA) iha Ministériu
Negósiu Estranjeiru no Kooperasaun Internasionál Kamboja nian. Superviziona
Relasaun Diálogu ASEAN no Timor-Leste nia adezaun ba Membru ASEAN no nu’udar
sobrevivente rejime Khmer Rouge, Sr. CHUN nia servisu distintu halo nia simu
Medalha Osan-Mean ba Servisu Distintu husi Samdech Techo HUN SEN no medalla
THNAK MOHA SEREY WATH husi S.M. Liurai NORODOM SIHAMONI”, Dehan Prezidente
liuhusi Komunikadu imprensa iha loron 29/04.

Prezidente Ramos-Horta hatutan
tan, fó benvindu ba Embaixadór CHUN no espresa apresiasaun ba Kamboja nia apoiu
ne’ebé metin ba TL, destaka signifikadu husi avansu diplomátiku ne’ebé loke
dalan foun ba kooperasaun.

“Estabelesimentu
embaixada rezidente Kamboja nian iha Dili reprezenta la’ós de’it formalidade
diplomátiku ida, maibé kompromisu klean ba aprofundamentu husi ita-nia relasaun
bilateral,” afirma Prezidente Ramos-Horta. “Kamboja sai ona parseiru
ida-ne’ebé folin-boot iha ita-nia viajen ASEAN nian, no ha’u fiar katak iha
Embaixador CHUN nia lideransa, ne’ebé nia esperiénsia iha asuntu ASEAN
partikularmente folin-boot ba ita, ita-nia nasaun sira sei harii ligasaun
amizade no kooperasaun ne’ebé metin liután”,Tenik Prezidente Republika.

Entretantu, Timor-Leste
no Kamboja fahe esperiénsia sira kona-ba ultrapasa dezafiu istóriku sira, hodi
harii sosiedade pasífiku no demokrátika, hodi kria fundasaun ida ba komprensaun
no kolaborasaun ba malu. Tanba Nomeasaun ba Embaixadór rezidente dahuluk
Kamboja nian, reprezenta avansu signifikativu iha relasaun diplomátika entre
nasaun Sudeste Aziátiku rua ne’e no refleta importánsia Timor-Leste nian iha
asuntu rejionál sira.

Jornalista : Geraldino Magno

Editor  : Média RKDTL